創刊辭

尚生活 - 尚未達到嘅生活

喺過去幾年你同我都經歷咗好多變遷，好多香港人嘅人生變得面目全非，有啲直情係 up side down。身為香港人，即使環境變得有幾艱難、有幾多挑戰、甚至壯志未酬，無論身在何方，每一個香港人都要活好每一天。就好似《雷霆救兵》（Saving Private Ryan） 𥚃面Miller隊長，最後一口氣叫小兵Ryan “earn this” (活好你嘅一生) 一樣。

執筆之時，正是宣佈23條進行立法，香港正式退出自由民主法治嘅世界，成為威權專制管治會所嘅一員。隨之而來嘅係整個香港嘅國際地位、經濟、民生甚至人口結構都會有翻天覆地嘅改變。雖然係咁，其實喺香港加埋流散海外嘅香港人、我哋已經形成咗自己一個強大嘅族群，我哋正在喺世界各地發揮我哋嘅影響力。活好每一天 Life is up and coming，正正係我哋香港人嘅生活態度。

尚生活LivesUp 以副刊形式，免費為香港人帶嚟均𧗾飲食 balanced diet，等大家關心時事同世界大事之餘，食番啲補充劑 supplement。每日有唔同嘅專欄作家同大家閑話家常，無論係下午茶或者放工返屋企，嘆吓尚生活，搵番自己，重拾興趣、嗜好、日常生活、嚮往嘅lifestyle，進入番自己嘅世界。

好感恩尚生活嘅理念一出世就得到25位專家、學者、KOL、名嘴、奇人異士認同及支持。其中大部份喺英國、美國、加拿大、澳洲同喺香港。日後我哋將會邀請更多世界各地嘅香港人專欄作家加入，豐富大家嘅生活、國際視野同世界觀。尚生活除咗無新聞時事只有專欄之外，我哋亦係免費訂閱，期望更多香港人同我哋嘅朋友可以享受，亦提供一個香港人宣傳推廣嘅平台。

最後要強調係尚生活崇尚言論自由，專欄作家可以無拘無束，各抒己見，分享佢哋嘅所見所聞，所思所想，大家嘅思想視野不受限制。

尚生活，根據字典解釋，係「還」，即係仍未嘅意思，例如：「尚未」、「尚小」、「尚且」、「尚可」。尚生活就係尚未達到、仲要追求嚮往嘅生活。願大家香港人一齊砥勵前行，繼續 move on！